نيوه‌ڕۆى ئه‌مڕۆ يه‌كشه‌ممه 2022/10/16 له ديدارێكدا له هه‌ولێر به‌ڕێز نێچيرڤان بارزانى، سه‌رۆكى هه‌رێمى كوردستان وێڕاى به‌خێرهێنان، پيرۆزباييى ده‌ستبه‌كاربوونى له به‌ڕێز ماكسيم ڕوبين كونسوڵى گشتيى نوێى ڕووسيا له هه‌رێمى كوردستان كرد و هيواى سه‌ركه‌وتنى بۆ خواست، هه‌روه‌ها هه‌موو پشتگيرييه‌كى بۆ سه‌رخستنى ئه‌ركه‌كه‌ى و خواستى هه‌رێمى كوردستانى بۆ برده‌وان به په‌يوه‌ندييه‌كانى له‌گه‌ڵ ڕووسيا ده‌ربڕى.
لاى خۆيه‌وه به‌ڕێز كونسولى گشتيى نوێى ڕووسيا له هه‌رێمى كوردستان، خۆشحاڵيى خۆى به ده‌ستبه‌كاربوونى له هه‌رێمى كوردستان نيشان دا و ئاماژه‌ى به په‌يوه‌ندييه دێرينه‌كانى نێوان هه‌رێمى كوردستان و ڕووسيا كرد و هيواى خواست به پشتگيريى لايه‌نه په‌يوه‌نداره‌كانى هه‌رێمى كوردستان، بتوانێت په‌يوه‌ندييه‌كانى هه‌ردوولا به‌ره‌وپێش ببات.
له ديداره‌كه‌دا دوايين پێشهاته‌كانى عێراق و ناوچه‌كه به‌گشتى تاوتوێ كران.
